1. No category

Kw’Isoko
ry’Ubuzima
mu muryango w’abakristu
Diyoseze Nkuru ya Bujumbura
Tl 22 22 05 00 / 79 455 057 / 79 927461
E-mail: [email protected]
Site: www.isokoryubuzima.bi
"N’ukuri kuri jewe, ubuzima bwanje ni Kristu". (Ph.1, 21)
Igiciro:100Fr
Iki kinyamakuru gifasha gutegera Ijambo ry’Imana mu misa no mu buzima
26/4/2015 UMUNSI W’IMANA WA KANE WA PASIKA – UmwakaB
N°17
UMUSI MPUZAMAKUNGU WAHARIWE GUSABIRA ITORWA .
Nkuko ku mwaka ku mwaka vyama bigenda Ekleziya irahimbaza itorwa ku musi
w’Imana ugira kane hanyuma ya Pasika twita umusi w’Imana w’Umwungere mwiza.
Muvyiza rero Inama Nkuru ya VATICANO Ya II ya tuzaniye harimwo gutunganya
imigwi yitorwa kugirango urwaruka ruronke aho ruyagira, rurererwa kandi rugatohoreza kubijanye n’itorwa muri Ekleziya y’Imana. Muri Ekleziya y’i Burundi mu maparuwase yose iyo migwi (groupe vocationnel) iriho. Urwaruka ruramaze gutahura
akamaro kayo kuko ibafasha mu vy’ubukristu; n’abafashe inzira y’umuhamagaro wo
kwubaka izabo bakagenda bumva ko bagiye mubutumwa bw’Imana mungo bashinze. Kuki Ekleziya yashinze kw’isi yose uyu musi wo gusabira itorwa? Papa Yohani wa kabiri abiduhera inyishu itomoye ati: “Ubutumwa bwo gushwabura abihebeye Imana bukorwa kandi burabwa n’umuryango w’abakristu bose aho Ekleziya
igera hose, mu ma diyosezi, mu paruwasi no mu mibano mito mito”. Arongerako ati: “ Birakwiye ko umukristu
wese yumva ko abifisemwo uruhara.”(raba PDV n°41). Nico gituma rero kuri iri genekerezo rya 26 Ndamukiza,
Ekleziya itumirira abakristu bose gusangira umwitwarariko na Kristu we mwungere mwiza aho agira ati: “ Ivyimbugwa ni vyinshi ariko abakozi bakaba bake, saba nyene umurima arungike abakozi benshi mu murima wiwe.”
(Mt.9, 35-38). Ibiro vy’Abepiscopi ba Ekleziya y’Uburundi birasaba bishimitse ko haba ku rwego rwa Diyoseze
canke rwa paruwasi uyo musi wokwitegurigwa, ugafasha abakristu cane cane urwaruka kuzirikana akarorero ka
Kristu yitanze ngo turonke ubuzima, maze natwe biduhe kwumva ko dutumiriwe kutigungana ubuzima, ahubwo
twobutanga ngo abandi barokoke. Tugaca twumva ko ugushigikira amarerero (amaseminari na manovisiya) y‘abari
munzira yo kwihebera Imana mugutanga ituro kumwimbu wacu, ari naco gituma Ekleziya y’i Burundi yahariye
amezi y’ukw’indwi n’ukw’umunani kwegeranya iryo turo. Duhimbaje uyu musi mu mwaka udasanzwe aho umuvyeyi wacu Papa Fransisko yahariye uno mwaka ubuzima bwihevyi. Tuwuhimbaze dukenguruka iyo ngabirano ya
mutima mweranda iduha imiryango y’abihebeyimana bunganira abatumwa ba Kristu mukumenyesha ubwami
bw’Imana no mukuba ibimenyetso bizima vy’intsinzi ya Kristu. Mbere papa nyene mw’ikete yabandikiye abihebeye Imana aributsa abihebeye Imana ko bohaguruka bakamenyesha isi Inkuru nziza (Mk.16,15) maze bayifashe
kwakira ingabirano y’urukundo rw’Imana, bashikire abo bose bataye umwizero babamenyeshe ko Imana ibakunda
kandi ko ari Indavyi. Muri Diyoseze Nkuru ya Bujumbura rero turiko turitegura guhimbaza uyo musi wahariwe
itorwa muri Ekleziya, tuzowuhimbariza muri paruwasi ya Rushubi muri Vicariat ya Buhonga, tukaba dusavye
abakristu bose kuwuhimbaza mukanyamuneza twinovora ivyiza Imana yacishije kubatumenyesheje inkuru nziza
cane cane Abamisiyonari ba Afrika ( abapatiri bera), uno musi natwe tukamenya ko ari twebwe tuhamagariwe kuba
abamisiyonari ngo tumenyeshe Kristu no mubice vy’isi bitaramumenya. Patiri Nzeyimana Eric
Tera intambwe kugira utange ubuzima. Ekleziya idashika aho abantu bari ntaco imariye abakristu.
Akanyamuneza ka Ekleziya, n’ako kwibaruka, kuja guhiga intama zazimiye, kugira urukundo nk’urw’umuvyeyi, nk’urw’umwungere aja guhiga intama yatakaye. Iyo Ekleziya
yiyugaraniye muriyo, ntiyama ivyamwa n’aho inzego zayo zoba zitunganije neza, n’aho
amategeko yoba atomoye neza; ah’ubwo haca haba ukwihebura, ukwijirwa. Akaranga
k’Imana yacu, n’uguhoza, n’ugutanga urukiza, n’ugutanga amahoro. Ariko ikibabaje, n’uko abantu baronderera urukiza mu bintu, mu matungo, mu rudandazwa, mu bicumuro, ugasanga bahunga Mutima Mweranda. Ntitwiyegurira mu maboko y’Imana, ni co gituma umuco wayo utwagiriza. Uruhoza rusumba vyose ruva mu kwakira no gutanga ikigongwe. Kenshi
twiha amahoro atariyo. Amahoro y’ukuri ava ku kigongwe c’Imana no mu guca bugufi. Iyo duciye bugufi turaronka uruhoza n’amahoro biva ku Mana. Dusabe Imana iduhe uruhoza rwayo, uruhoza rwa Ekleziya yivako, uruhoza
dukura kwa Yezu, mu kigongwe ciwe no mu gutanga ikigongwe. Papa Fransisko (Oss. romano nº1-Janvier 2015)
IDOMINIKA YA KANE YA PASIKA - B
IGISOMWA CA MBERE: Ibik. 4, 8-12. Nta wundi
muntu n'umwe ashobora kudukiza
Ivyo dusoma mu gitabu c'Ibikorwa vy'Abatumwa:
Muri irya minsi, Petero yohejwe na Mutima Mweranda, yavuze ati: « Ben'intara namwe bashingantahe, ntege amatwi: ko mbona uyu munsi mutwagiriza iciza twagiriye ikimuga, mukatubaza ico twagikirishije, ni muje mwabimenya mwese n'igihugu
c'Israeli cumve kw'ico kimuga cakijijwe n'izina rya
Yezu Kristu, umunyanazareti, umwe mwebwe
mwabamba, Imana ikamuzura mu bapfuye: iryo
Zina niryo ryakijije uyo muntu ahagaze imbere
yanyu. Uyo Yezu, niwe rya buye, mwebwe bubatsi
mwari mwataye, ariko noneho ryabaye iry'ishimikiro. Bisubiye ngaha kw'isi, nta wundi muntu
n'umwe yigeze yitwa izina rishobora kudukiza. »
IGISOMWA CA KABIRI: 1Yoh 3,1-2 .
Tuzomubona nkuko ari
Ivyo dusoma mw'ibaruwa rya 1 ry'Umutumwa Yohani:
Bakunzi banje : Itegereze namwe urwo Data yadukunze we yadutoye tukitwa abana b'Imana, mbere
turi bo vy'ukuri. Nico gituma isi itatuzi, kuko na we
itamumenye. Bakunzi banje, kuva ubu turi abana
b'Imana, nayo ico tuzoba ntikiramenyekana. Muga-
bo ico tuzi, ni uko muri ico gihe, aho Yezu azozira,
tuzosa na we, kuko tuzomubona nkuko ari.
INKURU NZIZA: Yoh. 10, 11-18 . Umwungere mwiza
yigura intama ziwe
Ivyo dusoma mu Njili nyeranda yanditswe na Yohani:
Muri irya minsi, Yezu yavuze ati: « Jewe ndi wa
Mwungere mwiza. Umwungere mwiza yigura intama ziwe. Umucangero atari umwungere kandi atariwe nyen'intama,
abona imfyisi ije, akazita hano agahunga, na yo nya mfyisi ikazigwamwo, ikazishwiragiza. Ubwo rero,
ahunga kuko ari umucangero atababaye izo ntama. Jewe ndi wa
Mwungere mwiza ndazi intama
zanje, na zo nya ntama zikâmenya,
nkuko Data anzi nanje nkamumenya; kandi ndigura intama zanje. Ndafise n'izindi
ntama zitari mur'ubu busho, na zo nyene mbwirizwa kuzizana ngo zizokwumve ijwi ryanje kandi
hazobe ubusho bumwe n'umwungere umwe. Ico
Data ankundira n'uko ntanga ubuzima bwanje, nze
nsubire kuburonka. Ntawubunyaka, ni jewe nyene
ubwanje ndabutanga. Ndi n'ububasha bwo kubutanga n'ubwo gusubira kuburonka niryo teka
naciriwe na Data.»
« Jewe ndi wa mwungere mwiza yigura intama
ziwe ». Bavukanyi, nkuko Ekleziya ibidutegereza uyu
musi w’Imana wa kane wa pasika,
duhimbaza « Yezu mwungere
mwiza.» N’ibisomwa vyeranda
bitwereka ko Yezu we mwungere
mwiza yatanze ubuzima bwiwe
kugira ngo atwegeranirize twese
mu ruhongore rumwe rw’abana
b’Imana. « Itegereze
namwe
urwo Data yadukunze we yadutoye tukitwa abana b’Imana mbere turibo vy’ukuri.» Uwo mwitwarariko w’Imana ku busho bwayo wariyerekanye muri Yezu mwungere mwiza. Yezu yaratwitangiye atanga ikiguzi c’amaraso yiwe aradupfira ku
musalaba kugira ngo atwegeranye twese muruhongore
rumwe arirwo Ekleziya nyeranda. Kugira ngo dutegere
neza iyi nkuru nziza y’uyu musi twobanza tukihweza
mu mico n’imigenzo y’abayahudi ingene vyari bimeze
ku-bijanye n’abungere. Bavuga ko mw’ijoro abungere
baja hamwe bakumvikana ingene begeranya ubusho
bwabo mu ruhongore rumwe gurtyo hakaba hariho
umuntu umwe aguma kw’irembo acungereye ubwo
busho. Abasuma ntibashobora kuronka aho baca kiretse bamenye urugo. Mu gatondo, niho rero abungere
bagaruka kuraba ubusho bwabo atabwoba bagahamagara umwumwe ubusho bwiwe abwerekeza ahari
ubwatsi. Ng’aho rero aho Yezu ashaka kutwereka:
« jewe ndi wa mwungere mwiza .» Yezu arazi intama
imwe imwe yose ayihamagara mw’izina ryayo niwe
atwereka aho duca tumukundiye atwerekeza mu bwatsi
butotahaye. Yezu rero ntashima ko tuba abakristu b’ingwiza murango. Yezu arakuzi: kubera iki ushaka kwinyegeza muri rwinshi? dutumiriwe nyabuna kumukuri-
kira atwugururire tubashe kwinjira. Arinjiza intama
nshasha zemeye kwinjira mu ruhongore arirwo Ekleziya, ihwaniro rikuru ry’abamwemeye, bakiriye urukiza
n’ikigongwe vyiwe. Intama yose arazi ikiyibereye, iyigwaye, iyicumbagira arayitwararika (…). Hariho rero
n’intama zazimiye, hari izigenza nk’izitagira umwungere, izitorotse ziva mu ruhongore hari n’izataye
umurongo zigahunga umwungere. Abo bose Yezu ababwiye ati: « Jewe ndi umwungere mwiza, umwungere mwiza yigura intama ziwe.» Hari rero intama
zemera kugaruka zigasubira mu ruhongore. Ni abo bumva ijwi ry’Umukama, bakabona ukuri, bakisubirako
bagasubira kwinjira mu ruhongore. Intama nziza iyo
yazimiye irabira kugira umwungere ayumve aho iri. Ni
kwa guhurumbira isakramentu ry’ikigongwe, ni kwagusaba impanuro umusaserdoti ….Tumenye kwama
duhamagara Yezu mu gihe twazimiye, turiko turajuragirika, twabire duti: « Dawe ngirira ikigongwe kuko
nacumuye cane.» Yezu arashaka kutwereka ko arazwa
ishinga no kudukura mumuzimagiza, mu manga, akitwararika umwe umwe wese ku giti ciwe akarazwa kandi ishinge n’umuryango w’Ekleziya. Yezu atuguma
hafi kugirango atwegeranye twese. Si wa mwungere
yumva imfyisi ihuhumye agaca ata akomoka ni umwungere adatinya urukamvye. Tumenye ko ubusho bugirwa n’umwungere. Muri iki gihe hari abama bariko
barazimiza abandi mukubata mu manga bakabatuma
bajuragirika. Kuri uyu musi umwe wese mu babatijwe,
aratumiwe kuba nawe nyene umwungere mwiza aho
ari hose kuko ntahandi akura akarorero atari kwa Yezu.
Ubwo bwungere buratwandukira kuko mw’ibatisimu
tuvukana na Yezu Kristu gurtyo tukaba ubwambere
abungere b’imibiri n’imitima yacu, tukaba kandi abungere ba bene wacu. Mu gihe twigenjeje nabi tukabati-
TWUMVIRIZE IRYO IMANA ITUYAGIRA
rimutsa tuba turi abungere babi, abangushi. Muze twisabire cane cane kugumana na Yezu tuvome iwe twame twitangira bene wacu. Dusabire n’abarongoye iki
gihugu cacu bamenye ko batumiriwe kwigana Yezu
mu kubera abo bajejwe abungere beza bashobora no
kubigura. Amen. Patiri Paul RUCUMUHIMBA.
Yezu Umwungere mwiza. Yezu avuga ati: Jewe nd’umwungere mwiza: Umwungere mwiza
amenya intama ziwe nazo zikamumenya (Yo.10,14). Turi intama za Yezu. Yezu arazi intama imwe imwe yose,
ayihamagara mw’izina ryayo. Turi ubwoko bwinshi bw’intama. Hari izigamburuka
ijwi ry’umwungere. Hari n’iziyobagiza ijwi ry’umwungere, zigatoroka umwungere
zikaja kwona; bene izo ntama zikigenza nk’izitagira umwungere. Hari intama zizimira canke zikazimizwa, canke zikagarariza umwungere. Mbega twokwishira mu
murwi uwuhe w’intama? Izimwumvira canke izimutoroka? Umwe wese aratumiriwe gusuzuma umurwi w’intama arimwo muri iki gihe. Tureke Yezu aturagire, atwerekeze mu bwatsi butotahaye, iruhande y’amazi adasuma ngo turuhuke, ngo umushaha wacu uremuruke. Yezu arakira intama nshasha zemeye ko azibera umwungere; arazinjiza mu ruhongore arirwo Ekleziya, ihwaniro rikuru ry’abamwemeye,
bakiriye urukiza n’ikigongwe vyiwe. Intama yose arazi ikiyibereye; iyirwaye n’iyicumbagira arazitwararika kuruta. Intama yatakaye ikemera kugarurwa ngo isubire
mu ruhongore ayakirana igishika. Arahimbarwa n’abaca bugufi bakagaya akabi
kabo, bagahurumbira isakramentu ry’ikigongwe, bakemera kuyoborwa na Mutima
mweranda, bagasaba inkomezi mu gisabisho. Yezu arajwe ishinga n’umwe umwe wese ku giti ciwe mu bo
yacunguye, natwe ni tumwiyegurire, twemere ko atuyobora. Generose Nininahazwe.
Yozefu Mweranda, Umuvunyi w’abakozi, dusabire.
Mu guhimbaza umusi mpuzamakungu wahariwe abakozi n’akazi, (italiki imwe Rusama) Ekleziya yarashatse ko abakristu bohimbaza Yozefu Mweranda Umukozi. N’akaryo keza ko kuzirikana akarorero kiwe
no guhaya no kurata iteka ry’ibikorwa. Yezu yabaye umukozi mw’isaramara Yozefu
yakoreramwo. Ni nde mukozi yomusumvya kuninahaza Imana mu bikorwa vyiwe
vya misi yose? Yozefu, umubaji abayabaye, niwe Imana yatoye ngo abe umurezi wa
Yezu, yahavuye acungura isi mu guca bugufi akabambwa ku musalaba. Abantu b’i
Nazareti bamubonye bahora bavuga bati: « Uwo si wa muhungu w’umubaji ?... »
Uwo mubaji aciye bugufi, ni we Imana yatoye ngo atubere akarorero k’ubwira n’umwete mu bikorwa, umutima utekanye, ubwitonzi, ubugamburutsi, ukwitanga, ugushira imbere ishaka ry’Imana … Paulo mweranda nawe ati: “…murazi neza ingene mwotwigana, kuko tutareze
amaboko iwanyu, kandi atawe twaririye ivya gusa, ariko twama dukora ijoro n’umutaga, ata gikenurwa,
ata buruhe twibanga, kugira ngo ntihagire uwo tugora muri mwebwe… Ni hagira umuntu yanka gukora,
n’areke n’ukurya”. Ibikorwa biratagatifuza. Iteka ry’umuntu riva ku buryo arangura umurimo ashinzwe. Nka
Yozefu mweranda umuvunyi w’abakozi, akazi kacu ni karangwe n’ukwemera, ukwizigira n’urukundo. Igikorwa
cacu tukigire igisabisho. Muvukanyi, ninahaza Imana ku murimo wawe, uwurangurane ishaka n’ubwira. Ni wakire
neza abaje bakugana kandi ubatunganirize nk’uko bitegerejwe. Urondera akunguko? Karondere atawe ugunze,
koresha ubwenge n’inguvu zawe. Iyungunganye, bishobotse wifatanye n’abandi. Rinda uburuhe hako wiba canke
urya imitsi abandi. Ngo uwutabeshe ntasumira umwana? Ngo igisuma n’igifashwe? Yezu Kristu arashika mu nyifato no mu migenzo yawe kugira ngo asambure ivyo vyose bitamuninahaza muri wewe, akakugira mushasha.
Muvukanyi, shira akazi kawe mu minwe y’Imana, niho nayo izoguhezagira, igahezagira n’ibikorwa vyawe. Akazi
ufise ntikagushimisha? Mu kurindira ko uronka akandi, ako ufise ugakore neza. Uti jewe ndi umushomeri!! Erega
ntakinanira Imana. Ntutakaze ukwemera n’ukwizigira kwawe. Mu kurindira, ntiwinenaguze igikorwa na kimwe.
N’ube urakora ico uronse, ugwanye ubunebwe n’ubuyererezi. Wiyakire, umusi w’Imana warategekanijwe. Marie Rose.
Uwihebeyimana ni uwo akurikira Yezu. Umweranda Guido Maria Conforti abandanya kutwigisha ati: “Mu buzima bwihevyi, umutima witanga ku Mana utiziganya, yitangira umutima n’ingabirano zose z’inema zayo. Ubuzima bwihevyi bushobora kwiyerekana nk’ubusazi, ubweranda
buvuye k’umusalaba budushikana kubuhirwe bwuzuye. Muri ubwo buryo, dutambuka twihuta
tugana ihangiro ryacu ntayegayezwa, kuko tutegukira namba ibintu vyo kw’isi, tutiyegukira twebwe nyene, ariko twegukira rwose Imana, yo gusa ishobora kurangura ivyiyumviro isinzi vy’umutima wacu nyabworo. Uwihebeye Imana akuraho intambamyi yose yotosekaza ubumwe nyabwo kumwe n’Imana. Umweranda Fransiskiyo wa Sale yandika ati: kubera ko ubugamburutsi
bwica ubwishime, ubworo bucuvya ivyijiji vy’amaso, ubwerentegerwa busambura ukwizigitirira rwose ku vy’isi, n’uko Imana ishobora kwunga ubumwe n’umutima yayihebeye mu karanga
gasumbirije. Umweranda Bernardo, umwe mu bigisha bakuru b’ubuzima bw’umutima, apfunyapfunyiriza agaciro kiryo shingiro rikwegakwega mw’ijambo rikurikira: “Mu buzima bwihevyi, umutima ubaho mu
bukomezi bwinshi, ugwa gake kabaho, wibogora vuba bwango, utambukana ubwitonzi bwinshi, wuzuye ingabirano
zisumbirije, unezerejwe n’amahoro menshi cane, ushikira ibigero mu buryo bwakarusho mu mwizero, uragabanya
ububabare bwawo, utahukana urugori rwiza cane”. (Guido Maria Conforti Mweranda).
DUSHEMEZE IMANA KU MUSI KU MUSI
D Idominika ya 4 ya Ac.4, 8-12; Zab.117,1.8-9.21-
26/4
Pasika - B
Zita
27/4
L
28/4
M Pierre Chanel, Louis
Marie Grignion de
Monfort
29/4
M Catherine de
30/4
J
Sienne
Piyo, Laurent
1/5
V
Joseph travailleur
2/5
S
Athanase
23.26 1Yo.3,1-2; Yo.10, 11-18
Ac.11, 1-18; Zab.41, 2-3.42, 3.4;
Yo.10, 1-10
Ac.11, 19-26; Zab.86,1-3.4-5.6-7
Yo.10, 22-30
Ac.12, 24---13,5a;Zab.66,23.5.6.8 ; Yo.12, 44-50
Ac.13, 13-25;Zab.88,2-3.2122.25.27 Yo. 13, 16-20
Gn.1,26---2,3;Zab.89,2.3-4.1213.14.16; Mt. 13, 54-58
Ac.13, 44-52;Zab.97,1.2-3ab.
3cd-4; Yo. 14, 7-14
Jewe ndi wa mwungere mwiza. Umwungere mwiza
yigura intama ziwe.
Utinjirira mw’irembo ariko akamenera ahandi urugo
rw’intama, ni umwivyi n’umushimutsi
Nrabibabwiye ntimwavyemera. Ibikorwa nkora kw’izina
rya Data nivyo binshingira ingingo ariko ntimwemera
kuko mutari abo mu ntama zanje.
Unyemera sije yemera, yemera Uwantumye, vyongeye
umbona aba abonye Uwantumye
N’ukuri ndabibabwiye: nta musuku aruta shebuja, nta
ntumwa iruta uwayitumye
Umuhanuzi ntiyigera aninahazwa mu gihugu
yavukiyemwo no muryango iwabo
Ko mwamenye, muzomenya na Data. Ubu bwa none,
muramuzi kandi mwaramubonye.
IKIBANZA C’AMASABAMANA YA LITURGIYA MURI EKLEZIYA ( Ibikurikira)
Mu mwaka w’Ekleziya tuzirikana Ijambo ry’ubuzima:
Mu mwaka wa Liturgiya kandi, Ekleziya iradufasha gusoma n’ukuzirikana Ijambo ry’Imana, tukarica
irya n’ino mu mpande zose nkuru nkuru; gurtyo, uwashirutse umwete mu kuja mu Nkuka y’imisa
agashobora gusoma canke gusomerwa Bibliya nka yose mu kiringo c’imyaka 3:
- Mu guhimbaza umusi w’Imana hari Umwaka A /Umwaka B / n’Umwaka C. Mu mwaka A tuzirikana Injili ya Matayo n’ibindi bisomwa vyawuteguriwe; mu mwaka B ni Injili ya Marko n’ibindi bisomwa; mu mwaka C injili ya Luka n’ibindi bisomwa vy’uwo mwaka. Injili ya Yohani tuyizirikana
cane cane mu gihe ca Pasika no ku misi y’Imana canke imisi mikuru imw’imwe.
-Mu misi yo mu ndwi hagati (ahanini mu kiringo gisanzwe), hari Umwaka Impaire n’Umwaka Pairei. Ngaha Injili
iguma ari ya yindi muri iyo myaka 2, ariko igisomwa ca mbere n’Izaburi birahinduka rimwe muri iyo myaka 2.
MU MWAKA WA LITURGIYA
IBISOMWA
Umwaka A :
Umwaka B :
Umwaka C :
Matayo + Yohani
Marko + Yohani
Luka + Yohani
Année Impaire
–
Année Paire
Mu ndwi hagati
Ibisomwa bijanye n’umusi mukuru
Guhimbaza Aberanda
Umwaka impaire, ni umwaka aho igitigiri kitagaburwamwo na kabiri (nka 2011, 2013, 2015…) ; nayo umwaka
paire, igitigiri cawo kigaburwamwo na kabiri (nka 2010, 2012, 2014…) (Biracaza). Patiri CIZA Maurice SimonKu musi w’Imana
Pierre, Ubutumwa bwa Diyoseze nkuru ya Bujumbura bw’Inyigisho Nkomezakwemera n’Amasabamana : 71 143 369.
Yozefu Mweranda, turakwirukira mu magorwa yacu, wewe
Yozefu mweranda, n’aho dutabaje Mariya wa
munywanyi wawe mweranda, turakwishimiye na wewe, turagusaba. Mwarakundanye na wa mubikira yasamwe ata gicumuro, we nyina w’Imana; warakunze n’umwana Yezu nk’aho womubereye se. Nico gituma tugutakambira; turabe neza, twebwe Yezu Kristu yahawe n’amaraso yiwe,
wibuke n’ubukuru bwawe, tuburane, duhagarikire mu magorwa yacu. Waratunze Yezu na
Mariya, tunga n’umuryango Yezu yakunze. Dukize data w’umukondo, dukize umwanda wose,
ububeshi bwose; n’aho uri mw’ijuru, duhangaze mu ntambara, wewe muvunyi wacu utananirwa,
turwanire dushobore gutsinda amashetani y’umwijima. Nkuko kera wakuye mu rupfu umwana
Yezu, tabara n’ubu Ekleziya nyeranda y’Imana, yoye guhendwa n’umwansi, uyikize ababisha.
Dawe, duheke ku mutima imisi yose, tube tukwigana, duhagarikire na wewe dushobore kumara
urugendo rwacu neza, dupfe turi beranda, turonke ubuhirwe butazoshira mw’ijuru. Amen.
Ubutigu burageze. Mu misi ya vuba tugiye kuronka akanya ko gusubira kwitorera abatware kandi ni
vyiza. Ego niko twebwe abakristu dukurikiza intumbero y’Ekleziya gatolika mu biraba ubutungane
n’amahoro kw’isi nkuko umuvyeyi wacu Papa Fransisiko yabitwibukije mu nyigisho yiwe yarungikiye Ekleziya yose “Evangelii Gaudium”. Turamaze igihe kinini twambaza Mutima Mweranda ngwatumurikire tuzotore abatware beza, ntidusubire gutanako umwikomo. Dutegerezwa guhindura ibintu
bikaba vyiza ku neza y’igihugu mu gutora abo twitondeye neza, abazotunganiriza neza abo bajejwe.
Imbere yo gutora rero, banza witegereze neza, uhanuze umutima wawe, uhanuze abakwegereye
ubona ko boguha umuco. Tugire Kristu. Karoli Manirambona, paruwase St Michel.
DUCISHEMWO DUTWENGE: Samandari bamubabahamagaye abaja gukora ibikorwa rusangi utigera
kandi ntavyitaba s’ikindi:
nari mfise umugore
arankuramwo !! None ari nka wewe wumva nosubira
jije bati: Mbe Samanda, kubera iki iyo
uvyitaba? Nawe ati: Igituma ndavyanka
dusangiye n’uwundi mugabo hanyuma aca
kwipfuza ibikorwa rusangi?