23 SAUSOKSSMEDEN PÅ VÅGBØEN Av Helge Husby Dette fotoet frå stua på Vollan er teke i september 1913, ifølgje kalenderen på veggen. Den unge jenta er Elisabet Storset f. 1903, frå Innistua, Storset. Ho var av og til telefonpassar på Vollå, for det kunne vere folk som ringte dit for å spørre om nokon kunne gå med telefonbod i grenda. Tore og Ragnhild sitt ved det finpynta bordet. Biletet oppe til venstre er av bror til Ragnhild, Erik Jonson Storset. Biletet til høgre er av søstra, Mali Storset, f. 1859. Ho reiste til Chicago i Amerika, vart kjent som Mollie Storseth og testamenterte «Mollie Storseths legat» for m.a. kvinnegjerd innan handverk. Ho døydde ugift i USA i 1926. Blomsteren på det fine, heimlaga stativet ved vinduet ser ut til å vere den samme som står i stua i dag! Truleg kan den gamle blomsteren ha vore delt opp og vidareført. Termometeret i taket kan vere hengt opp for fotograferinga, eit statussymbol som måtte vere med. Eit unikt foto Eg arbeidde med innsamling av gamle foto i Aure kommune da det dukka opp ei unik negativglasplate, som etter digitalisering viste eit par med ei lita jente sittande i det som såg ut som ei storgardsstue. Det var store familiebilete på veggane, fint danderte blomstrar - og ein stor 24 Hendt og hender 2012 telefon på veggen. Da eg zooma inn på kalenderen på veggen, viste den september og året 1913. Ingen kjente att folket, stua eller bileta på veggen, og det unike fotoet vart eit mysterium. Denne negativen var i glasplatesamlinga etter fotografen Hans Ormseth. I fotoarkivet til Tingvoll kommune Nokre år seinare gjekk eg gjennom fotoarkivet til Tingvoll kommune, og der dukka samme fotoet opp, utlånt av Liv Mæle på Vågbøen. Det stod Tore Ormseth, sokssmed - og fotograf Hans Ormseth, Aure. Kva gjorde Hans Ormseth på Vågbøen? Hans hadde Ormseth-namnet frå garden Ormset i Aure og Tore frå Ormset i Tingvoll. Eg skulle seinare finne ut at dei hadde i alle fall felles interesse for kristeleg arbeid, som truleg hadde ført desse to sammen - sausokssmeden og fotografen. Sausoks laga av Tore Ormseth «T. Ormseth» Eg fatta òg interesse for det Hans Hyldbakk skreiv om denne svært dyktige sokssmeden. Da eg fann ei sausoks med «T. Ormseth» stempla inn i jarnet, vart eg ennå meir nysgjerrig.