1. No category

SAKSUTGREIING
Aurland fjellstyre
Møtedato: xx.9.15
Stad: Fjordsenteret
Sak 29/15. Innføring av restriksjonar på småviltjakta i Aurland statsallmenning for 2015
Saksopplysning/vurdering:
Fjelloppsynet har i sommar/haust registrert svært lite ryper i statsallmenningen
og elles i Aurlandsfjella. T.d. har sesongoppsyn Erlend Øydvin på 125 timar ute i
felt i juli – august registrert berre 25 ryper totalt, d.v.s. 1 fugl per 5. time i
gjennomsnitt. Observasjonane til dei andre som jobbar i fjelloppsynet går i same
lei; sjølv i normalt gode rypeområde i allmenningen er det lite fugl å sjå, og det
ein ser er stort sett vaksen fugl. Dette tyder på at kjuklingproduksjonen har vore
særs dårleg. Informasjon innhenta frå reinsjegerar og andre tyder på det same.
Takseringsresultat andre stader i Sør-Noreg syner at stoda er nokså lik over alt
(sjå t.d. heimesida til Norges Fjellstyresamband, der ein del av desse resultata er
publiserte). Dei som har uttalt seg om årsakene til den dårlege produksjonen
syner til dårleg ver i klekkeperioden, kollaps i smågnagarbestanden (som gjer at
rovviltet går meir over på å beskatta rypa). I tillegg låg snøen langt utover
sommaren, det var få snøberre parti, og såleis vanskeleg for rypene å unngå at
reira vart røva av rovvilt.
Fjellstyret har, ut frå § 23 i fjellova, høve til å innføra restiksjonar på jakta, m.a.
når det gjeld jakttid og -område, tal vilt som kan fellast, og tal jaktkort som vert
selde. Fjellstyret må og gjera vurderingar etter Naturmangfaldlova, før slike
vedtak vert fatta. Kommunen skal ha saka til uttale, før vedtak vert gjort. Det er
krav om førehandsvarsling minst 1 veke før saka skal handsamast, slik at dei det
gjeld får høve til å uttala seg. Vedtaket etter denne paragrafen i Fjellova tek til å
gjelda 1 veke etter at vedtaket er gjort, mot 3 veker etter vedtaksdato for dei
fleste andre type vedtak som fjellstyret gjer med heimel i Fjellova.
Fjellstyret har tidlegare gjort vedtak om innkorta jakttid for rype og hare. Jakttida
som er vedteken for desse artane i 2015 er frå og med 1. oktober til og med 23.
desember. Det har frå tidleg på nyåret vore opna for kortsal gjennom
nettportalen Inatur.no, og det er til no selt jaktkort til omlag 50 jegerar, alle
utanbygdsbuande. Det meste av dette er dagskort og 2-dagarskort. Me har høve
til å koma i kontakt med alle desse gjennom kontaktinfo som ligg på inatur-sida.
Eg meiner det vil vera lite føremålstenleg å innføra full freding av småviltet i
Aurland statsallmenning denne sesongen. Det vil i så fall innebera eit betydeleg
arbeid med å kontakta dei som har kjøpt kort med informasjon om at dei likevel
ikkje får jakta, og deretter refusjon av heile eller deler av summane som er
innbetalte for jaktkort (ein viss del av innbetalingane gjeld gebyr og provisjon til
Inatur). Eg vil tilrå at fjellstyret i staden stoggar kortsalet gjennom inatur, og at
det heller ikkje vert lagt ut jaktkortblokker på dei vanlege salsplassane i år.
SAKSUTGREIING
Aurland fjellstyre
Møtedato: xx.9.15
Stad: Fjordsenteret
Sak 29/15, side 2.
På denne måten vert talet på jegerar svært avgrensa, i høve til det som er vanleg
(119 selde kort i 2013, 183 i 2014). Sidan det i den aktuelle bestemmelsen i
Fjellova står at det ved innføring av restriksjonar på jakta skal vera rimeleg
balanse mellom innan- og utanbygdsbuande jegerar, bør det likevel vera ein
opning for å selja kort til innanbygdsbuande (alt sal til no gjennom Inatur har gått
til utanbygdsbuande). Dette kan i praksis gjerast ved at dei som er interesserte
vender seg til fjellstyrekontoret for å få kjøpt kort. Til vanleg er det snakk om 1015 innanbygds småviltjegerar som kjøper kort på allmenningen.
Eg vil og føreslå at fjellstyret fastset ein fellingskvote på 1 rype per jaktdag for
kvar jeger. Sjølv om det er vanskeleg å ha oppsyn med at ein slik regel vert følgd
under jakta, vil innføringa av ein slik dagskvote i seg sjølv kunna ha ein effekt, ved
at ein signaliserer at det i år er ein ekstraordinær situasjon med lite fugl, der
uttaket bør vera minimalt.
Alle jegerar bør oppmodast om heller å skyta vilt som beskattar rypa, som rev,
ramn, kråke og røyskatt.
Vurdering etter Naturmangfaldlova §§ 8 – 12
§ 8 (kunnskapsgrunnlaget): Lokale observasjonar, i tillegg til takseringar andre
stader i fjellområda i Sør-Noreg, syner at hekkinga til fjell- og lirype har slege feil i
år, og at produksjonen har vore minimal. Forskarar som har uttalt seg meiner at
jaktuttaket bør avgrensast i slike år.
§ 9 (føre-var-prinsippet): Sjølv om ein ikkje veit sikkert om normal jakt vil utgjera
noko trugsmål mot bestanden lokalt, kan ein vera på den sikre sida ved å
redusera jakttrykket slik det er føreslege , stoppa kortsalet på nettet og innføra
dagskvote per jeger.
§ 10 (økosystemtilnærming og samla belastning): Det er klimatiske og biologiske
tilhøve som er årsak til den dårlege bestanden no. Ein kan unngå å «leggja stein
til børa» ved å leggja restriksjonar på jakta.
§ 11 (kostnadene ved miljøforringing skal berast av tiltakshavar)
og
§ 12 (miljøforsvarlege teknikkar og driftsmetodar) er uaktuelle i denne
samanhengen.
SAKSUTGREIING
Aurland fjellstyre
Møtedato: xx.9.15
Stad: Fjordsenteret
Sak 29/15, side 3.
Framlegg til vedtak:
1. Fjellstyret stoggar salet av jaktkort for rype og hare i Aurland statsallmenning
(gjeld ikkje felleskortet Myrdal/Broksfjellet). Dei som fram til 4. september
har kjøpt jaktkort gjennom Inatur får høve til å nytta dette (gjeld omlag 50
kort).
2. Det vert innført dagskvote for rype på 1 fugl per jeger. Slik kvote kan ikkje
overførast frå ein dag til neste, eller mellom jegerar.
3. Det vert høve for innanbygdsbuande jegerar å kjøpa jaktkort på
fjellstyrekontoret (inntil 10 kort totalt). Kortsal vil elles ikkje skje på dei
vanlege salsplassane i bygda.
Vedtaket er gjort med heimel i §23 i Fjellova.
Fjellstyrekontoret, den 3.9.15
Harald Skjerdal
-dagleg leiar-