Museumssenteret i Hordaland inviterer til seminar og Workshop Den gamle verdsveven - levande kulturarv frå nord og sør i møte med praktisk forsking 14. september 2013 på Osterøy museum Oppstadveven er kjent frå store delar av verda. Den har vore brukt til ulike tider og til ulike føremål, frå det enkle til det mest avanserte. Noreg er det einaste landet i den vestlege verda der tradisjonskunnskapen enno lever - i greneveven i Troms og i åkleveven på Vestlandet. Dette er likevel berre ein del av veven sine bruksområde. Frå tidlegare tider har ein bevart produkta, ikkje framgangsmåtar. Dei siste åra er det gjort praktisk og teoretisk forsking for å rekonstruera og sansynleggjera arbeidsmetode og arbeidsgang. Særleg gjeld dette dobbeltvev og den mellomalderske vararfelden. På seminaret og workshopen 14. september 2013 møtes for første gong dei to levande tekstiltradisjonane og den utprøvande. Seminaret/workshopen er ope for alle. Målgruppa vil vera generelt tekstilinteresserte, dei som arbeider med og/eller er særleg opptekne av tradisjonsformidling og levande kulturkunnskap. Program 08.30 Kaffi 09.00 Velkommen! 09.15 Oppstadvev i historisk perspektiv – ein sveip ved professor Lise Bender Jørgensen 10.00 Grenevev – oppsetjing og vevemåte ved Anna Salo og Åse Grønbakk 12.00 Lunsj 13.00 Å veva dobbeltvev på enkel reiskap ved Katherine Larson 14.00 Åklevev og vadmålsvev ved Marta Kløve Juuhl 15.00 Redskap for billedvev i gammel og ny tid. Jon Pettersen Pris: kr 500 Påmelding: [email protected] Om foredragshaldarane Lise Bender Jørgensen er professor ved NTNU, Institutt for arkeologi og religionsvitenskap. Hennar forskingsområde er: arkeologiske tekstiler og drakt i Europa og den romerske verden: handverk og teknologi som kunnskapsformer; arkeologihistorie. Anna Salo er frå Manndalen i Troms. Ho er ein tradisjonsberar som har lært å veva grene på oppstadvev av mor og tante. Saman med mannen dreiv ho lenge ei vevstove der ho også utvikla og tok patent på figursydde vamsar, vovne på oppstadvev. Åse Grønbakk frå Kåfjord i Nord-Troms representerer den museale og den praktiske grenetradisjonen. Ho har arbeidd ved Holmenes sjøsamiske gard i Lyngen som er ei avdeling i Nord-Troms museum. Formidling, m.a. av vevinga, var ein viktig del av hennar arbeid. Katherine Larson har PhD frå University of Washington i Seattle. Emnet for doktoravhandlinga er Norwegian Double-Weave and the Warp-Weighted Loom. Arbeidet byggjer på tekstile observasjonar og eksperiment. Ho er såleis ein av dei etter kvart fleire som ser det nødvendig å kombinera teori og praksis for å kunna driva forsking og kunnskapsutvikling i eldre tiders arbeidsteknikkar. Marta Kløve Juuhl, Hordaland fylkeskommune (50%) med arbeidsplass på Museumssenteret i Hordaland/Osterøy museum er vevar og faglærar og har teke opp arven etter Berta Liarbø. Ho har hatt fleire kurs i oppstadvev, på Osterøy og i Amerika. Ho arbeider med boka Klingande steinar saman med Hildur Håkonardottir og Elizabeth Johnston, og har prøvd ut måtar å veva vadmål på, og forska på den mellomalderske vararfelden. Jon Å Pettersen er førsteamanuensis i tekstil ved Kunsthøgskulen i Bergen. Han særmerker seg ved eit breidd spekter innom vevkunsten, har lang erfaring som designar for norske og utanlandske veveri. Rekonstruksjon er eit viktig arbeidsfelt, likeeins å kombinera kunstnarleg uttrykk med funksjon og kontekst. Han er vel kjent med gamle og digitale verkty. Han fekk "Merket for god design 2007" av Norsk designråd. Seminaret er støtta av