Radøy Venstre
Program for Radøy Venstre for perioden 2015-2019 Få fart på Radøy Jobb nummer ein i Radøy kommune er å betre økonomien. For å gjere det vil Radøy Venstre arbeide målretta for at det skal byggjast fleire bustader og etablerast fleire bedrifter med nye arbeidsplassar på Radøy. Dette vil gi pengar i kommunekassa, men for å lukkast trengs nye idear og ein meir positiv utviklingskultur. Gjennom god dialog og samarbeid med byggebransjen kan me lukkast i å få fram både store og små bustdautviklingsprosjekt. Tilsvarande må Radøy kommune verte langt meir aktiv når det gjeld å fremje næringsutvikling. Også her handlar det mykje om å bruke tid på dialog og samarbeid med bedrifter og næringsaktørar, og ta initiativ for å lokke bedrifter til å etablere seg på Radøy. For å lukkast med dette, må det utøvast eit aktivt politisk leiarskap med vilje til å nytte eit politisk fleirtal til det beste for innbyggjarane.Radøy Venstre ynskjer å ha ei sentral rolle i styringa av dei neste fire åra, og vil bidra til å få fart på Radøy. Effekten av denne innsatsen vil ikkje komme med ein gong, og det vil derfor også vere naudsynt også med tiltak som gir innsparing eller auka inntekter raskare. Radøy Venstre legg vekt på å føre ein ansvarleg økonomisk politikk utan underskot, og ser at det kan vere naudsynt også med upopulære grep. I arbeidet med kommunebudsjetta må ein snu alle steinar og vurdere konsekvensar før det vert konkludert. Spennande bustadutvikling Ved arealdisponering i kommuneplan og områdeplanar, er det viktig å sikre gjennomføringevne gjennom dialog med bygge- og eigedomsutviklingsaktørar. For Radøy Venstre er det viktig at større byggefelt og bustadutviklingsprosjekt vert realiserte i tilknytning til sentraene med gangavstand til skule. Samstundes er det viktig å ta heile kommunen i bruk ved å vere positiv til frådeling av bustadtomter i dei ulike grendene, så lenge det ikkje er til skade for miljø, friluftsinteresser og landbruk. Kunnskap og like muligheter Radøy Venstre vil: ✔✔ arbeide målretta for bygging av fleire bustader på Radøy gjennom ein positiv utviklingskultur, tett samarbeid og god dialog med byggenæringa. ✔✔ at plan- og byggesaksavdelinga skal vere serviceinnstilt og løysingsorientert, samt aktivt arbeide for utvikling. ✔✔ arbeide for ei spennande og god tettstadutvikling på Manger og Bø. ✔✔ leggje til rette for utvikling av attraktive bustadområde i sjøfronten på Manger, Bø og Sæbø, mellom anna gjennom realisering av ny områdeplan for Bø, nye og utviding av eksisterande bustadområde på Manger og eit nytt bustadområde på vestsida i Sæbø-området. ✔✔ arbeide for bygging av fleire leiligheiter for unge og 55+ på Manger, og eventuelt på Bø og Sæbø. ✔✔ ha utarbeidd ny bustadsosial handlingsplan, og bygging av fleire sosiale bustader med statstilskot gjennom offentlegprivat samarbeid (OPS). Eit mangfaldig idretts- og kulturliv Kultur, idrett og friluftsliv har ein stor eigenverdi i seg sjølv knytt til opplevingar, trivsel og folkehelse. Radøy Venstre er oppteken av å leggje til rette for mangfald. Innan idrett- og friluftsliv betyr det både å leggje til rette for den organiserte idretten og å leggje til rette for fysisk aktivitet hjå flest mogleg innbyggjarar. Innan kultur betyr det både å ta med seg kulturarven og å sjå det moderne og nyskapande. Radøy Venstre vil: ✔✔ at Radøy kommune skal vere ein aktiv støttespelar for idrettslaga med tanke på vidareutvikling av idrettsanlegga, som til dømes etablering av nye kunstgrasbanar på Bø og på Manger. ✔✔ oppretthalde opningstida i svømmebassenget i Radøyhallen ut mai, slik som i år. ✔✔ arbeide for etablering av nye nærmiljøanlegg/ballbingar, til dømes på Manger skule og Hordabø skule. ✔✔ satsa på turstiar, og ferdigstille turveg på Manger. ✔✔ arbeide for vidareutvikling av friluftsområde og badeplassar på Radøy i samarbeid med Bergen og omegn friluftsråd. ✔✔ sikre eit godt samarbeid med frivillige lag og organisasjonar. ✔✔ arbeide for vidare utvikling av Utvandrarsenteret på Sletta. ✔✔ ha betre formidling av kulturminner, mellom anna med informasjonstavler, og vidareføre tilskot til istandsetting/restaurering av kulturminner. ✔✔ vidareutvikle formidling av kulturhistoria, til dømes steinalderen ved Fosnstraumen og kystkulturen. ✔✔ arbeide for etablering av ein dugnadspott for lag og organisasjonar, t.d. for å utføre skjøtsel av uteområde for ålmenta. ✔✔ vidareføre satsing på Radøy som korps- og musikkommune. ✔✔ arbeide for sambrukshus/kulturhus i Prestegarden, mellom anna med kulturkafé. Trygge og gode oppveksttilhøve For Radøy Venstre er det ei prioritert oppgåve å arbeide for trygge og gode oppveksttilhøve for barn og unge. Dette inneberer mellom anna trygge og gode nærmiljø, barnehagar og skular utan mobbing og eit mangfald av spennande fritidstilbod. Radøy Venstre vil: ✔✔ vidareføre ungdomskoordinatatorstillinga, og støtte aktivt opp om ungdomsarbeidet og ungdomsrådet sitt flotte og viktige arbeid. ✔✔ styrkje helsesøstertenesta på Radøy ungdomsskule. ✔✔ arbeide for tryggare skulevegar gjennom målretta arbeid for realisering av tiltaka i trafikksikringsplanen. ✔✔ arbeide for at fleire skal få fri skuleskyss på grunn av farleg skuleveg. ✔✔ ha nulltoleranse for mobbing i Radøy-skulen, og dersom mobbing går så langt at ein elev må skifte skule, skal det vere mobbaren. ✔✔ arbeide for ei betre barnehageløysing med mål om å samle Prestmarka barnehage i eitt bygg på Manger og Bø barnehage i eitt bygg på Bø. ✔✔ arbeide for innføring av to hovudopptak i barnehagane. ✔✔ arbeide for eit meir innhaldsrikt SFO-tilbod, til dømes gjennom samarbeid med kulturskulen og idrettslag. Gode skular på Radøy Radøy Venstre vil ha ein skule for kunnskap, kreativitet og kompetanse. Dette er avgjerande for at kvar einskild elev skal få moglegheit til å til å ta sine sjølvstendige val, og for den framtidige verdiskapinga. Ein sterk offentleg skule som set den einskilde elev fyrst, som har høg kvalitet og kompetente og motiverte lærarar er viktig for Radøy Venstre. Lærarane er skulen sin viktigaste ressurs. Dei siste åra har Radøy-skulen vorte råka av fleire budsjettkutt, og det vil ikkje vere forsvarleg å kutte meir. Samstundes er Radøy-skulen dyr i drift på grunn av fire barneskular. Dersom valet står mellom nye, generelle driftskutt i skulen og å gjere noko med skulestrukturen, vil Radøy Venstre velje det siste. Radøy Venstre vil: ✔✔ fremje kvalitetsutvikling i Radøy-skulen med fokus på grunnleggjande ferdigheiter i lesing, skriving og rekning. ✔✔ fortsetje satsinga på tidleg innsats gjennom La linea, slik at ein så raskt som mogleg kan ta tak i utfordringar hjå den einskilde elev og at alle vert sett og inkludert. ✔✔ satse på kompetanseutvikling med vekt på vidareutdanning for lærarar. ✔✔ arbeide for opprusting av uteområda, og sikre godt vedlikehald på skulebygga. ✔✔ arbeide for utnytting av loftet på Radøy ungdomsskule, dersom det let seg gjere brannteknisk. ✔✔ arbeide for å styrkje lærartettleiken. Omsorg når du treng det Radøy Venstre vil ha ein velferdspolitikk som set folk først og som gir alle tryggleik når det trengs. Eit velferdssamfunn vert målt etter korleis ein tek vare på dei svakaste. Respekt for ulike ynskje er grunnlaget for ei verdig omsorg. Radøy Venstre vil: ✔✔ arbeide for etablering av fleire sjukeheimsplassar. ✔✔ seie klårt nei til konkurranseutsetting av helse- og omsorgstenester. ✔✔ arbeide målretta for rekruttering av helsefagarbeidarar og sjukepleiarar, også i eit langsiktig perspektiv, mellom anna ved å ta i inn lærlingar og aktiv marknadsføring retta mot skuleungdom som skal velje utdanning. ✔✔ utgreie og vurdere å ta i bruk moderne omsorgsteknologi med sikte på at eldre kan bu lenger heime. ✔✔ arbeide for etablering av eit dagsentertilbod innan rus og psykiatri, gjerne samarbeid med frivillige lag og organisasjonar. ✔✔ oppretthalde dag- og fritidstilbod til menneske med nedsett funksjonsevne. ✔✔ fornye og vidareutvikle frivilligsentralen til meir målretta arbeid opp mot lag og organisasjonar, samt andre frivillige krefter. ✔✔ vurdere etablering av ei vaktmeisterteneste for eldre heimebuande og andre med behov for det til sjølvkost. ✔✔ leggje til rette for betre integrering og inkludering av flyktningar og andre innvandrarar, mellom anna ved bruk av frivillige flyktningeguidar. Betre vegar og miljø Radøy Venstre vil arbeide for utbetring av vegstandarden på Radøy, både gjennom nye, større vegprosjekt og utbetring av eksisterande vegar. Dette fordi vegstandarden på Radøy er svært dårleg. Samstundes er Radøy Venstre oppteken av å ta vare på den flotte kystnaturen me har på den grøne øya, og å leggje betre til rette for å nytte den til rekreasjon og friluftsliv. Radøy Venstre vil: ✔✔ arbeide for realisering av ein vestre ringveg i Nordhordland over Bognostraumen til Meland som første trinn i tverrsambandet. ✔✔ arbeide for opprusting av fylkesvegane på Radøy, med øvste prioritet på fv 409 Bø-Manger. ✔✔ arbeide for fleire gang- og sykkelvegar. ✔✔ følgje opp kommunen sin klimaplan. ✔✔ hindre forsøpling, mellom anna gjennom haldningskampanjar og ved å støtte opp om ryddeaksjonar i samarbeid med NGIR. ✔✔ kjøpe inn fleire EL-bilar til heimetenesta ved utskifting av bilar, dersom det let seg gjere av omsyn til køyrelengde. ✔✔ stimulere til rydding av kulturlandskap. ✔✔ ha strenge miljøkrav til oppdrettsanlegg. ✔✔ arbeide for å betre vasskvaliteten i Mangerspollen. ✔✔ arbeide for bruk av miljø- og dyrevennlege alternativ til vegsalt på kommune- og fylkesvegane. ✔✔ arbeide for eit betre kollektivtilbod, spesielt på kveldstid, samt forlenging av nattbussrutene i helgene. Nyskapande næringsutvikling Satsing på næringsutvikling har vore nedprioritert i Radøy over tid, og sjølv om det er mange flotte bedrifter her, skulle me gjerne hatt fleire og dermed også fleire arbeidsplassar. Radøy Venstre vil føre ein næringspolitikk som legg tilhøva betre til rette for eksisterande bedrifter, gründerar og nyskaping, der kommunen heiar fram bedriftene. Radøy Venstre vil: ✔✔ at kommunen skal ha ein tett dialog og samarbeid med næringsaktørar for å fremje næringsutvikling, og mellom anna etablere Radøy næringsforum som ein regelmessig møtestad mellom næringsaktørar, administrasjon og politikarar. ✔✔ at administrasjonen skal vere serviceinnstilt ovanfor næringsaktørar, og aktivt arbeide for bedriftetableringar og såleis bidra til å skape fleire arbeidsplassar. ✔✔ få utarbeidd ein lokal handlingsplan med konkrete tiltak for næringsutvikling i tråd med regionale planar. ✔✔ marknadsføre kommunen som ein attraktiv stad å etablere bedrifter i. ✔✔ vidareutvikle Manger som senter for handels- og servicenæringa, og herunder spesielt arbeide for etablering av kafé, apotek og fleire kompetansearbeidsplassar saman med næringsaktørar. ✔✔ leggje til rette for utviding av eksisterande og etablering av nye arealintensive næringsområde for tyngre verksemd, og herunder arbeide for nytt næringsområde med moglegheit for djupvasskai i tilknytning til tverrsambandet. ✔✔ vidareutvikle reiselivsnæringa ved marknadsføring gjennom Bergen reiselivslag, og samarbeid med næringsaktørar for å satse på mat, kultur og opplevingar, samt betre tilrettelegging for båt- og bubilturistar. ✔✔ oppretthalde storleiken på landbruksarealet til matproduksjon, mellom anna ved å vere positiv i delingssaker der drivande bønder ynskjer å kjøpe tilleggsjord, aktiv bruk av SMIL-midlar, leggje til rette for skogsdrift og målretta støtte til unge bønder. ✔✔ arbeide for etablering av kulturkafé i Prestegarden, enten i samarbeid med næringsaktørar eller frivillige organisasjonar. Ny kommune Radøy Venstre er positiv til forhandlingar om ein ny kommunestruktur, men meiner det er innbyggjarane som bør ha siste ordet i ei folkerøysting. Dersom Radøy Venstre skal kunne støtte at Radøy skal verte ein del av ein ny kommune, må nokre krav verte innfridde. Radøy Venstre vil: ✔✔ stille krav om at det gode ungdomsarbeidet i Radøy vert vidareført med ungdomskoordinator og ungdomsråd, og gjerne at denne modellen vert overført til andre delar av ein ny kommune. ✔✔ stille krav om servicetorg og andre kommunale funksjonar i rådhuset på Manger. ✔✔ ha satsing på tettstadutvikling i tidlegare kommunesenter og lokale sentra. ✔✔ arbeide for reduksjon i eigedomsskatten og likebehandling i den nye kommunen. 1. Frode Hervik (f.1976) Prosjektleiar, Manger 2. Agnes Hoshovde Bernes (f. 1995) Student, Sæbø 3. Ståle Villanger (f. 1978) Lageransvarleg, Hordabø 4. Birthe Haugland Frotaule 1965, Sæbø 5. Jan Tore Hvidsten 1956, Manger 6. Marianne Villanger Lilletveit 1979, Manger 7. Sigstein Århus 1958, Manger 8. Wenke Tolleshaug 1965, Sæbø 9. Bård Mangerøy 1966, Manger Les meir om vår politikk og våre kandidatar på våre nettsider. Venstre.no/Radøy 10 Kjersti V. Mjøs 1954, Hordabø 11 Øystein Frotaule 1961,Sæbø 12 Bjørg T. Murberg 1954, Manger 13 Torbjørn Drivenes 1957, Manger 14 Gro Kolstad 1952, Manger 15 Ingvild Brattetaule 1997, Hordabø 16 Harald Jordal 1942, Manger 17 Knut Skjelanger 1952, Manger 18 Anne B. Brattetaule 1971, Hordabø 19 Stephen Baug 1989, Manger 20 Kari Frotaule 1995, Sæbø 21 Truls Reigstad 1968, Manger 22 Jannicke Baug 1971,Manger 23 Ørjan Taule 1979, Sæbø 24 Haldis Johnsen 1951, Manger 25 Magnar Kartveit 1956, Manger 26 Gro Håland 1977, Hordabø 27 Bjarne Storheim 1932, Sæbø 28 Arne Villanger 1929, Hordabø Foto: Bård Mangerøy Venstres kandidater i Radøy
© Copyright 2024